عاشیقم، حُسنونـه ای گـول، دئییلـم بیگـانـه
یـانیـرام آتـش ِ عشقـه، نئجـه بیــر پــروانــه
دئمه دیم بیر کسه زولفونده اسیر اولدوغومـو
ایسترم، سیـرّیمـه یـول تـاپمـایـا هـر دیـوانـه
نه جفا چکسـه وفـا اهلـی، بـلادن قـاچمـاز
رحمت اول کسلره، هر درده دؤزوب مردانـه
زایـر ِ کـویـون اولان جنّتــه رغبــت قیلمــاز
عاشیقِ وصلین اولان مئیـل ائلـه مـز رضـوانـه
قلبیمین شیشه سی ذؤقِ مئیِ عشقینله دولوب
اوُنودارمی سنی، شـؤقـونـده اولان مستـانـه؟
لبلرین، باده. مضر اولدوغون، اؤیرتدی منـه
اوُدوزوب عقلیمی مئی، زایل ائـدیـر پیمـانـه
واحد، آیدیندیر، اوُزاتماق نه گرک مسئله نی
خوشلاماز خلق، ا گـر اولسـا اوُزون افسـانـه

علی آقا واحد