نازلیم، Nazlim

هم آی سؤنوبدو ، هم الدوز چیراغ - چیراغ  نازلیم

                         آلا   گؤزوندن  ایراق   سئوگیلیم  ،  ایراغ   نازلیم

                        گلنده   ،   ده    گونشی   پای   گتیرکی   ظولماتدیر

                        و جانتاییمدادا – دای   یوخدو   بیر  چیراغ   نازلیم

                      هانی   باهار  هاوالی   سئرجه لر   ،    سیغیرچینلار

                      هانی  بو  باغچادا  باغدا  او  سس   سوراغ   نازلیم

                       ساچیندا     سئودا     پریشانلیغین     گؤره     بیلمم

                       قاییت – قاییت  یئنه  من  آینا  ،  من  داراغ   نازلیم

                       تیکان   بیتیر   باخیشیمدان   آخی    علاجیم    یوخ

                       کی   اللریم    آسیلیبدی   اوراغ  –  اوراغ   نازلیم

                      باخیشلاریندا    بئشیکلنمیش   آل    گونشله    قاییت

                     هم  آی  سونوبدو ،هم  اولدوز چیراغ –چیراغ نازلیم     

 

نادر الهی

 

اونودولموش اوجاق، Ünudülmüş öcaq

باخمایین  کی  اونودولموش  اوجاغیق  ،   آی ائللر

                       داوا  درمان  دولوسو بور  –  بوجاغیق ،  آی ائللر!

                       بیزی    سهمانلاماغا     بیرجه    خیالیز     یوخدور

                       بو  پریشانلیغا   ساچلی   –   ساچاغیق  ،  آی ائللر!

                       غفلت اؤلدورسه  بوگون ده  بیزی  ،   وآللاه  بیلیرم

                       بیز   صاباح   بو   کفنی    ییرتاجاغیق    آی  ائللر!

                      بیزی  زنجیر له مک اولماز، دلی  بیر کولگه   کیمی

                      قاچانی   قووملی ،  قووساز   قاچاغیق ،   آی ائللر!

                      بیزی    چوخدا    اوشاغا   –   آنلاماز     قییمایاسیز

                       نه  قده ر پاسلی – کوت  اولساق  پیچاغیق  آی ائللر

                       تاپماق  اؤیرنمه  میشیک – آنجاق  ایترمک بیلیریک

                      بودیغال     دونیادا    گؤرنه    قوچاغیق     آی ائللر!

                      آنام  اوخشاردی کی  " نادر"   بالامین  کول  گؤزونه

                      اوبیلیرمیش     اونودولموش    اوجاغیق     آی ائللر!

نادر الهی

یاز دردیمی ساغالتمادی، Yaz dərdimi sağaltmadi

یاز    دردیمی    ساغالتمادی

یاراما    بیر قیش   باغلایین

گؤیلومه    بولود    دؤشه یین

گؤزومه   یاغیش   باغلا یین

***

تای  توشو  قول  قاناد  چالدی

زیروه لرین   اوستون   آلدی.

چیرپینا      چیرپینا     قالدی

اوره ییمه    قوش    باغلایین

***

بوگونلرده    کئچدی      بلکه

دورنا   اولوب  کوچدو   بلکه

بو    قفس ده    اوچدو   بلکه

ایاغینی     بوش     باغلایین

نادر الهی

تورپاغام، Torpağam

تورپاغام  ،  ائللرین  آغلار  آلایی    وار   منده

گؤزو   یاشلی   آرازی  ،  آرپا چای  وار  منده

بایاتی   داغلی  سینمدن  اومانیم  ، قوی اومسون

بیر  چیچک  هر  دره نین  نغمه  پایی  وار منده

یایلیغیندان  ال  آتیب  دَرمَه میشم ....سئودیجه ییم

ائللرین   گوللو  یازی  ،  گوللو   پایی  وار  منده

بوکمه قورلو سسیمی بوخچا لار بوکمه ...قورون

ایلدیریم    آیناسییام  ،  اود    هارایی   وار   منده

شنگولوم !  قاچ  أوزونو  قورتار الیمدن  هله لیک

قورد  وار  منده ... منیم  نازلیم ! ...آیی  وار منده

جانیمی   یوللارا  سردیم  ،   گونش   آددیملا مادی

حسرتین    گورنه    دومانلی    دولایی    وار  منده

داماریمدا   قان  آغیر  آددیم   آتیر ....  نیلَه   مَله لی

ائللرین    بلکه    بوغولموش    سارایی    وار  منده

نادر الهی

قبریستان، Qəbristan

 قبریستان ..........

 تاماشالی سرگی

 کیتاب کیتاب ،درگی درگی ..........

 جیلیدلر ..........

 بایاتیلی  ،  آغیلی

 اولدو اؤلدو ناغیلی

 آی الله!

 گؤره سن بویازیقلار ..........

 گویدن دوشه ن آلما پایلارینی یئدیلر ...؟

 بیرینی اوخویورام اؤترگی ..........

 :،، یاشار ..........

 اون سکگیز باهار ..........،،

 داها هئچ بیر زاد اوخونمور

 نه یامان الدن دوشوب بو قبیر داشی...

 گؤره سن یاغیش دؤیوب .....؟

 یا انا سینین گؤز یاشی ....... ؟

نادر الهی

من نه چاره قیلیم قارا بختیمه، Mən nə çarə qilim qara bəxtimə

من نه   چــاره    قیلیم    قــارا   بختیمه

زَهَــر   لی    ایچگیه     مـزه     نینسین؟

سورمه    گؤزلیگی     بیر    آز   آرتیرار

آمما   دای  کور اولان     گؤزه    نینسین؟

****

فلک   اوخون   آتیر ،  الینده   یای   یوخ

فلکین

آتدیغی

اوخــلارا 

سای

یوخ

   

بو گؤزدن او گؤزه هئچ  بیر هارای یوخ

ایندی    اؤزگـه    گلیب    بیزه  نینسین؟

****

حسرت 

چکدیگیمیز 

گؤر 

نئچه

 ایلدیر

کاش  بیر ایل اولایدی ، دییه یدم   بیلدیر

گؤزومون 

یاشلاری 

چوخ

دئمه لیلدیر

سو گوزه دن

لیلدیر، 

کوزه 

نینسین؟

****

نادرم 

بیر 

سینه 

قیزیل تک کوزله

یــوللاری   گؤزله دیم   نیگران   گؤزله

سیز دیین ، بو یازیق بیر قوری سؤزله

ایــریه 

نینسین، دوزه نینسین

نادر الهی

  

آماندی بیرده بو گولدان یازا یئریکلمه سین، Amandi birdə bü güldan yaza yerikləməsin

آماندی  ...   بیرده   بو گولدان   یازا  یئریکلمه سین

یئتر ....  یتیم   یارمیز  ، دای   دوزا   یئریکلمه سین

اگر ... اگر ایکی   جانلی  گئجه م   گونش  دوغمور

آیا     یئریکلمه سین ،     اولدوزا      یئریکلمه سین

ائلین    آشیقلاری   آلما   دئیل  ...  کی   کرپیچ    آتی

گلین    گرایلی    لاریم     دا    سازا      یئریکلمه سین

اوغوللاری 

یئل 

آپاردی ،

 گلین 

جیغازلارینین

ساچیندان   آسدیغی 

یویره ک ، قیزا یئریکلمه سین

 

هانی  ،  هانی    او   بولاغ   ،  

بولاغ اوتو

   ،    دادلیم

یوخون

دا   دای 

نانایا 

یارپیزا 

یئریکلمه سین

قاراگیله م ! نه  او   خرمن  ، نه ده   او  چرچی    قالیب

دِء     کتلی     گؤیلونه  ،  آغ ساققیزا     یئریکلمه سین

یئریکله دی

 ،

 اوره یی 

پارچا 

پارچا 

سیندی  ،  یئتر

یازیقدی  ،  بیرده بو گولدان یازا یئریکلمه سین

نادر الهی

قار یاغیش، Qar Yağiş

قاریاغیش  اینله ییر ... یاغیم  قورتاریم ...

 باهارلار   تله سیر  ...  قیشلار    تله سیر

 سردیییم    قاناری    ییغیم      قورتاریم ...

 دئییب ... یئل   تک  اسه ن قوشلار تله سیر

****

 دالینا    اود    چاتیب    ایللریم   منیم

 گئج  آچیب  تئـز سولوب  اللریم منیم

 آه ...  قیشا    تله سیر   تئللریم    منیم

 کیپریکلر  تله سی ، قاشلار    تله سیر

                      **

 چینار اوغرون  اوغرون   بویومو    سوزور

 کندیر  مندن  ساری    لاپ   أوزون   اوزور

 دؤزور ... هئچ    بیلمیرسن  نه تَهَـر   دؤزور

باشیمی      یارماغا        داشلار      تله سیر

نادر الهی

یارا گل گل دئیم!!! هارا گلسین؟، Yara gəl gəl deyim!!! Hara gəlsin

یارا ،،گَل گَل،،  دییم ...  هارا  گلسین

  هارا  گلسین  کــــــــی  زینهارا  گلسین

 بیزه کی  عشق   بیر گـــون  آغلامادی

 آی  اونــــون  آغ گونو ،  قــارا  گلسین

 آی  اونـــون دا   منیم  کیمی  جیـــگری

 گــــوُُزلــــریندن   پـــارا پـــارا   گلسین

 یــار  دِییَه رکَن   یاریتمادیم   سنی  من

 آی  قـادان  من   کیمی   یـــــارا  گلسین

 بیرجه گولزاره سیره چیخ ....کی گولوم

سنی  گوردوکده  گــول ،  زارا  گلسین

 جانی   حـورمتله  ساخلادیم   بیر عومر

 سن   گلنده   دئــدیـم    کـــارا   گلسین

 گـوز  یاشین   سئل   کیمی  آخیتدیم من

 دیین   ایتگین   گئدن   سـارا  ،  گلسین

 آمـمـا   گَــل گَــل   نیه   دییم   نـــــــادر

  یـــارا  ،،گَل گَل،،  دییم... هـارا گلسین

نادر الهی

سن سوسوزسان، Sən Susüzsan

سن  سوسوزسان ، عطش منی اوُلدورور

 بیر ایچیم  سو اولدم ... ایچ  منی  قورتار

 ساری  سونبول  کیمی  حسرتده   یاندیم

 دولو دن ایستدوین ...  بیچ  منی  قورتار

     ***

قارا بولود   کیمی   یاغیشا   دوللام

آچیلمامیش گول تک، غنچه ده سوللام

فتنه سئل تک آخسا، من کُورپون اوللام

مندن  کئچمه لیسن...کئچ منی  قورتار

    ***

 نـــــــادرم   منلیـگیم   مـحبتیم   دیـــــر

 فلکین   روزیسی  ،   قانیم   اَتیم   دیر

 بیر جوت گَوز، واریوخدا ، واردولتیمدیر

 قوربانلیق  سئچیرسن ...سِئچ منی قورتار

نادر الهی

گؤردو بالتالارین...، Gördü Baltalarin

گؤردو  بالتالارین  هجوم  چکمه  سین

گیزله نه  بیلمه دی ...  قاچا  بیلمه دی

تورپاق  ائشیتمه دی  گیلئی لیک  سسین

اوره یین   هئچ کیمه   آچا    بیلمه دی

اوره یین  آچمادی  او  هئچ   بیرکَسَه

دوغراندی ...

               توکولدو...

                         عادی دن عادی ...

ایاغی   آلتداکی   تورپاقدان  ...  نَه سَه

دیری  ایکن   بیر  آددیم   دالی   قویمادی

باخیرسان اوره یی  جادار جاداردی

اگر  دیله   گلسه  قوزوتک   مَلَه ر

بیلمیرم ... نه سیردی...

                        هله کی  واردی

کَسیلَه  کَسیلَه  قالیب  مئشه لر

نادر الهی

خلقه بولود کیمی، Xəlqə bulud kimi

خلقه  بولود  کیمی   ایللر  آغلادیم

هئچ  اوزومه  بیرگون آغلامادیم من

خلقه  قیزیل  سَرای  باشی  باغلادیم

اُوزومه  نون  باشی  باغلامادیم  من

***

ای گُوزل  !  باشیمدان  چیخمادی  هاوان

دردین...یوخ ، یوخ...منی اؤلدوردو داوان

ایللر  بویو  اولدو  یئدیگیم  یاوان

هئچ   قولدورون  بوغون  یاغلامادیم  من

 ***

دلی  شیطان  دییر دور قوی اوز داغا

سونا  کهلیک  کیمی   ینه سوز  داغا

دؤزدوم دوست  الیندن نئجه  یوز داغا

هئچ  الیمین  اوستون  داغلامادیم  من

 ***

نادرم  سینَه مدَه   سیزیلدار  یارام

عشقینده ، گوزلیم ، اؤلونجه  وارام

دییردیم   دردیندن  داها   دیغلارام

نه جانیم برک ایمیش...دیغلامادیم من

*********

نادر الهی

سسیم گرایلیدی، Səsim giraylidi

سسیم گـرایلیدی ، گؤیلوم  شیکسته دی ، نازلیم

علاج ندیر کی یارام اوسته اوسته دی ، نازلیم

بونرگیزیم ، بو بَنُوشَه م ، بو حسرتیم ...بودا من

 قاییت ...گؤزوم قولاغیم ،یولدا ،سسده دی،نازلیم

 

آنـام  بـاهـار

، ایــاغ  اوسته

 نــامـاز قیلا بیلمر

 کی سرو اوغوللاری ، قَددی شیکسته دی ،  نازلیم

 منیم سسیمدی، بو قاتیل کیمی آسیلمیش ساز 

 منیم  سسیمدی ، بوقوش کی قفسده دی  ،  نازلیم

 بولاغ دئیل، گوزو آغلار قـالان اوشاغلاردی

چیچک  دییل گولوش آغزیندا ، پوسته دی ،  نازلیم

دومانلانیر باخیشیندا سوال ............ آخی نه دئیم

سـسیـم  گـرایـلیـدی  ،گؤیلوم شیکــسته دی، نازلیم

نادر الهی

بولودام، Buludam

بولودام ........آمما   آغلاغان   دییلم

اوره ییم   دولماسا  ،   یاغان   دییلم

بیر  حلال  نوطفََه م   اولماسا سؤزدن

بیر غزل   کُؤرپَه سین  دوغان   دییلم

شعر! آلا گُوز مارال ! سن آرخایین اول

دؤشلرین   دولماسا ،  ساغان     دییلم

  بیــر بولاغ نغمه ، بیــــــر بولاغ شعرم

یعنی  کی بوش جیغان  ویغان   دییلم

قلبیمی    خشله دیم     یـادا    تـانیشا

نیله ییم ....  چوخدا  مال ییغان دئیلم

من   نسیمی    بابام    دییه ن    مردم

بوسفیل     دونیایا     سیغان     دییلم

ائل  یاوانلیق گزیر ......... آمان  نادر

من  باری   بیر   آجی   سوغان   دییلم

نادر الهی

سوسموشام، Süsmüşam

سوسموشام آمما  سینَه م  طاقچاسی  سازدان  دولودور

سوسموشام ... آمما  گیلئی  گؤیلوم  آوازدان  دولودور

من   اله   غملی  کی     باغریمدا     پاییز    دالدالانیر

او  اله  شاد کی   باخیش  باخچاسی   یازدان   دولودور

تانییا   بیلمه میشم قبیله می  .......  هیهات  هیهات

آمما   گؤیلوم مچیددیر کی   نمازدان    دولودور

باخیشیمدان بایاتی  چیپجالانیر .........  نیله  مَه لی

آنا باغریم  سارادان   بوشدو.......  آرازدان  دولودور

گُوز  یاشیمدا  هله  ساغ   سول  خیالین  چیممَه ده  دیر

گَُوز یاشیم بو قوروماز   گُول   هله قازدان دولودور

آه عدالت ........  آه عدالت  .......  آه عدالت  ..... یاندیم

هارداسان ... گل کی سینه م سازدان دولور

نادر الهی

آیناییق، Aynayiq

بیر ال عصاسیدا ده ییلیک ، اوختاییق سادا

بیزدن باری چپرده توخونمور یاییق سادا

آه بیر چوپانداقوینونا آلمیر بیزی داها

بیر عومر دوز چوره ک دولوسو چانتاییق سادا

بیر کیمسه سینی نه اویادیب نه یاتیرتمیشق

داشقین باغیرتی ییقسادا ، لام لای لاییق سادا

بیر ایستی مهربان باخیشین حسرتینده ییک

یوخدو باخان بیزه ، دورو بیر آیناییق سادا

حسرت حاسارینین دالیسیندا لاپ اپریدیک

آه ! بیرجه کوچمه دیک ، کوچری دورناییق سادا

نادر الهی 

کوچه لر، Küçələr

سنسیز سینیخیبدیر ، قوجالیبدیر کوچه لر

گل گور نه گونه اوزون سالیبدیر کوچه لر

کئتدینسه ده گئتمه دی دادین ، آغزیندان

گل ، تامسینا – تامسینا قالیبدیر کوچه لر

نادر الهی

پنجره تک، Pəncərə tək

قالدیم باخیشی یولدا دونان پنجره تک

کیپریک چالا بیلمه دیم اینان پنجره تک

گلدین نه ده گوزله نیلمز ، آه کی اوره ییم

دیسگیندی قفیل داش توخانان پنجره تک

نادر الهی

دونن - بوگون، Dünən - Bügün

دونن....

اوره ییمز یاخین ...الیمیز اوزاق

بیریمیز  گونشده، بیریمیز آیدا

گَل  بو سرحدلری  آرادان پوزاق

حسرتلی حیاتدان آخی نه فایدا ...؟   

بوگون ...

ایندیسه  اللرین  الریمده   دیر

آنجاق اوزاقلاشیب اورکلریمیز

دییرم آ گولوم ! فایداسی  ندیر؟

بیر تاوان آلتیندا یاشاساقدا بیز...؟

نادر الهی

آج اوراغلار، Ac Örağlar

گولور آمما دوداغیندان گولوش آغلار گویه ریر

آغلاییر آمما بنووشه دولو باغلار گویه ریر

سوسور آمما باخیشیندان بایاتی دامجیلاییر

سوسور آمما بوغازیندان بوغاناقلار گویه ریر

سینه سینده یارالاردان دره لر وار هله ده

سینه سینده ن هله ده وار آجی داغلار گویه ریر

ساز اونون حسرتیدیر کی بوغازیندان آسیلیب

چای اونون ، چشمه اونون دردی کی چاغلار گویه ریر

اللریندن هله ده دوز چوره ک عطری سوزولور

اللریندن هله ده سوتلو اوفاقلار گویه ریر

بو نه یازدیر مئشه لردن قارا بالتا بوی آتیر

بونه یایدیر زمیلردن آج اوراغلار گویه ریر

نئچه سرو آه گویه ریر نفسیندن بوی- بوی

گور سسیندن نه بولودلار نه بولاغلار گویه ریر

آغلاییرسان آنا؟ یوخ یوخ گوزومه توز دولدو

گولور آمما دوداغیندان گولوش آغلار گویه ریر

نادر الهی

اوره ک آیناسی، Ürək aynasi

قیزاردین حالینی بیلدیم

اوز اوره یین آیناسیدیر

آه ........ دئدین دالینی بیلدیم

سوز اوره یین آیناسیدیر

****************

سئوگی فیتنه ، سئوگی بلا

بیزی سالیر حالدان حالا

داغلاردا هر قانلی لالا

یوز اوره یین آیناسیدیر

****************

سنسیز بیر سینیق ساز کیمی

قیریلیب باغریمین سیمی

گوزومده گور اوره ییمی

گوز اوره یین آیناسیدیر

نادر الهی

آرتیر، Artir

بو  کوهنه ده ییرمانداکی دنلر دارتیر

مرد اسگیلن اندازه ده نامرد آرتیر

آرتیق سینادیقجا دونیانی ، من گوردوم

آرتدیقجا دوشونجه اینسانا درد آرتیر

نادر الهی

 

اوره ییمده، Ürəyimdə

نه دانیشا بیلدیم ، نه دینه بیلدیم

دویونلندی قالدی  سوز اوره ییمده

اته ییمده دئییل کی توکم یئره

آلیشیر بو وورغون کوز اوره ییمده

*********************

یاشایا بیلمره م ، اوءله بیلمیرم

یانیب دونه جه یم کوله بیلمرم

بیر آغیز اوره کدن گوله بیلمیرم

آمما آغلاییر مین گوز اوره ییمده !!!!

نادر الهی

گویه ریر هله، Göyərir hələ

بیر عاشیق اکه سن بیر ساز گویه ره

بیر شاعر اکه سن بیر نانا حسرت

بیر پاییز اکه سن بیر یاز گویه ره

من بونا حسرتم – آی آنا حسرت

********************

بیر چیله اکه سن بایرام اولمامیش

گویه ره رنگ به رنگ بایراملیقلاری

آلنی ترله مه میش ، گوزو دولمامیش

آتالار دره لر ، اوشاق پالتاری

*********************

محبت اکه سن مراد دره سن

بو نه هاوا دئیل نه هوس دئیل

چوخ نفرت اکمیشیک گولوم ! گوره سن

توفنگ دردیگیمیز داها بس دئییل

*******************

حسرت سینه میزه مین بیر داغ چکیب

مله آ جیرانیم ، آ قوزوم ! مله

هاچانسا بیر نامرد بیر اووچو اکیب

قفس قوشدان دولو گویه ریر هله

 نادر الهی

زلزله، Zəlzələ

بایاق آجیقلانیب طیفیل اوشاغا

(( تاپیب گویلون آلیم)) دئیب تله سیر

آراییر ، آختاریر باشی آشاغا

اللرین تیتره ییر ، اوره یی اسیر

********************

 هله بیر آزدا گئی بو کوهنه لری

بایراما چوخ قالیر نه خبریندی؟

بایاق آجیقلانیب بایاقدان بری

اومیدی دایازدی ، غمی ده ریندی

*********************

گورونمور دردی نین ، غمی نین سونو

باهار بولودو تک بوشالیر ، دولیر

آنجاق قینامایین آ دوستلار اونو

بعضا اوره ک دولور ، جیب بوم- بوش اولور

*********************

آراییر آختاریر یادینا دوشور

نازلا نازلا کوسوب قاشماغی

تورپاغی آریدیر ، تورپاغی ائشیر

تورپاقدان تاپیلیر بیر تای باشماغی

بالاتک باشماغی باغرینا باسیر

مله ییر گوزوندن یاش یاغا-یاغا

چشمه قولاغ آسیر ، چای قولاغ آسیر

سس دوشور دره یه ، سس دوشور داغا

************************

کوسولو بنووشه م ، یارالی لالام

من بایرام هوسلی نه تهر قالیم؟

گل تزه سین آللام ، گل نازلی بالام

کوهنه باشماغی نین قاداسین آلیم

نادر الهی

گون گونه قالاندی .... Gün günə galandi

.....گون گونه  قالاندی ، بیرگون  ده  ووردو

اوغول  آناسی نین  اوزونه  دوردو .........

سانکی   گؤی   گورلادی ، یئر   سیلکَه لَندی

آنانین       گوُز      یاشی     یئره    الندی

آنا   دؤشلرینی   الینه   آلدی ................

:"بالا امدییین سود  حارامین اولسون" .......

دئدی ........آمما   گوجلو   دییه   بیلمه دی

أوزوده   بیلمه دی   نیه .......... بیلمه دی.

اوغول    ائل    ایچینده    یامان     قیناندی

ائل  اونو  دانلادی ،  ائل  اونو  داندی .....

آنجاق    او    چیگنینی    یوخاری    آتدی

آجیغین    بیر    آجی    گولوشه      قاتدی

:قورو  سود  اَمیشم  منیم  باکیم  یوخ .....

دؤشونه      باشینا       قیییماز      آنالار

بئله   بیر  اودلاردا  گرگ   یانالار .......

نادر الهی

 

عزیز بیلدیگینی ، ایی بیلدیگینی Əziz bildigi. Eyi bildigi

............عزیز بیلدیگینی ، ایی بیلدیگینی

ائوده    بیربیر    سئچیر   قویور   قیراغا

دونن       چیخارتمیشدی      بیلرزیگینی

ایندی ده   خالچانی   لوله له ییبدی .......

نیلسین .... بالاما   دَه یَن   ده ییبدی .....

دییرم   قوی  سؤزون  آغزین  یان  سالیم

:قیزیم! ائو   توکورسن ؟ نه    خبریندی؟

آی   بالا   بایراما   یازا   قالیرکی .....

باخیرام ...........باخیشی    اله دریندی

ینه  نذیر  نیاز  سؤزون  سالیر کی .....

آتام  گله گله  بونو  مچیده  ساللیق ......

آی  انا ! سونرادان  اؤزوموز  آللیق ...

اله    یالواریر کی   کؤز کؤز   یانیرام

ایچیمدن    اود     توتوب    آلوولانیرام

گونده کی     دئدیگی     نذیر    نیازدی.

دئدیکجه  دییر بس  دئدیگی  آزدی ......

آی   کئچیب ، ایل   کئچیب ..........

همان هماندی

ایندی ده  چیخاریب   بویون   باغینی.

آماندی آی دوشمن ، آی  دوست آماندی

بالام  چکه بیلیر  آتا  داغینی ........

نادر الهی 

بیر عَطیر ... Bir Ətir

بیر  عَطیر ، بیرجه باخیش ، یاز هوسیم   وار  نیلیم

نانا   نرگیز  کیمی   بیر  آز   هوسیم    وار  نیلیم

باخمیرام   کی   داها   تویدا    آشیق   اویناتمیرلار

هله ده   سؤز   هوسیم ، ساز   هوسیم   وار   نیلیم

گؤلَه  دؤنسم ، بیر  ایکی  جیرانا   حسرت   چکیرم

گؤله  دؤنسم ،بیر  ایکی   قاز   هوسیم   وار   نیلیم

آلما  آتماق هوسیم  یوخ ....."هَه" دئمه  سئودیجه ییم

"یوخ"  دِء   سندن  هَلَه ده  ناز  هوسیم  وار   نیلیم

بالتا  قارداش! بیر آز  ال  ساخلا   یامان  داشلانیرام

آخی   سالخیم   سؤیودَم ، یاز   هوسیم    وار   نیلیم

نادر الهی

دییرلر هاودا ...... Deyirlər havada

دییرلر   هاودا   سس   اؤلمز   قالیر

گؤرون   طبیعتین   بیر  مُعجیزه سین

بوگونکو    عالیم لر    هاوادان   آلیر

داود  پیغمبرین  نئی نین  سسین ......

یعنی     بوگونکولر  ،   دونئکی لرین

سسینی    ائشیدیر    دریندن     درین

*****

مَلَه مَه  کامانیم   ،   مَلَه مَه    تاریم

دردینی  غمینی  هئچ   کیم   بیلمه ییر

بوخچا   بوکولسون   های هارایلاریم

سس لر  أوز  واختیندا! اِئشیدیلمه ییر

نادر الهی