گنجليک بويو اللريندن ياپيشديم
گؤزلریمی گؤزلرینه دیکه رک
دؤشومو دؤشونه داياييب،
بورنومو بورنونون اوجونا سورتدوم اؤلومون.
آخ! بو نه چئشيد سئويشمه!
دولغون دوداقلاري نئجه ده دادلي يدي
نامرد اؤلوم قيزينين!
کیان خیاو
اوزون غزل
قاشلارين بير غزل بئيتي
و گؤزلرين،
توفکدن سيچراييب چيخان ايکي قورشون کيمي کلمه.
هر شئيدن گوجلو باخيشين دونيادا
هر شئي سنين عشقينين اؤنونده عاجيز.
اَن گؤزه‌ل شاعيرلر سني يازيرلار
و اَن چوْخ مني يانديران،
سنسيزليک شئعيرلري.
کيم نه بيلير
چوْخ زامانلار آغ کاغيذلار بوْيونجا
اؤلوملر سني ياشاميش.
منيمسه بو جيزما-قارالار ايچينده،
ياشاميم سني اؤلور.
بونجا سن منده اؤلمه‌دين،ياشادين
چونکو يوْخسانسادا ذاتاً،
بوتون سيخينتيلاريما
بوتون يالنيزليقلاريما دوْلور آدين.
کیان خیاو
اؤلوم ديشاريمدا دئييل
ايچيمده بيلير‌م اوْنو.
اللريمده شئعير کاغيذي دير اؤلوم
گؤزلريمده بير موْدئل قيز شکيلي.
آجي توتونوم
شيرين چاييم
و حياتين بو قيتليق ايللرينده،
قفيل پاييمدير اؤلوم.
منيم ده اؤلوموم منه آيريلميش
بير بؤلگه بير به يه آيريلديغي تک.
بو يازي‌ني يازار کن
بير اَلي بوْينوما دوْلاشميش
بير الي بئليمه.
آه،سئوگيليم
اؤلومه باخ،اؤلومه!
بير اليني وئرميش اليمه سوْنرا
دوْداغي دوْداغيمدا
ديرناق چالارکن تئليمه،
اؤپوشوروک اؤپوشه‌ره‌ک سئوالي.
ياغ دا گتيرميش بيرآز دؤشلرينده
گؤيسومون يانقينليق ياراسينا سورتور.
بوتون سئوينج و کدري يله سئويره م اونو
و نه قَدَرغملي
و نه قَدَر گئرچک سئويره م
اوْ گول بَدَني!
بو شئعير اوْنون اوچون
بير حيات مکتوبوم اوْلسون
بير سئودالي سئويشمه‌م!
آه،اؤلومو بو دونيادان،
قاچيريب گئده بيلسه‌يديم!
آه،اوْ گؤزه‌ل بدني،
اؤزومه بير قوْناق ائده بيلسه‌يديم!
کیان خیاو
هله چاپ اوْلمايان کيتابلاريمدا،
سني آغلاديم ميصراع- ميصراع.
هله يوْزولمايان کابوسلاريمدا،
سني سئوديم ياتاق- ياتاق.
و هله سالينمايان شه‌هَرلرده،
سني آراديم بازار- بازار.
هاني؟ هايانداسان ائي يار!
کیان خیاو
ایچیمده بیر اؤلو اؤلموش ،باغیر دئییرلر اونا
آغیز دیلی ورم اولموش ، چاغیر دئییرلر اونا
گؤزومده قات-قاریشیق بیربولوددورعشق،آنجاق
قان آغلایاندا ، قولایجا یاغیر دئییرلر اونا
قودوز یابانچیلارین چکمه ایزلری ایله دولو
سینه مده جادده سالیبلار،جیغیر دئییرلر اونا
هاچاندی بیر آجی سانجی چکیر آنام تورپاغ
بو درد اونو بوغور آنجاق،دوغور دئییرلر اونا
بو یورد آتا-آنالی،کؤکلو-سویلو بیر یورددور
یئتیم دئییرلر اونا، آه، ساغیر دئییرلر اونا
و بیر کؤپک وطنیمده جینایت ایشلر لیکن
اؤزون ائله تانیدیر کی فاغیر دئییر لر اونا
منیم باهارچیچه ییندن ده اینجه دیرشئریم
توپانچا گولله لریندن آغیر دئییرلر اونا
قامیش قلم له قیزیل بیر غزل یازیرسام اگر
بو غم میتینگی دیر،آه،چال-چاغیردئییرلر اونا
ده میرعاشیق کیمی لال هئیکله دؤنن "کیانام"
و منده بیر اؤلو اؤلموش باغیر دئییرلر اونا
کیان خیاو