بو چکدیگیم غمی جانانه، من اؤزوم دئمه دیم

دئسـم، گـولـر بیـزه بیگـانـه، اؤزوم دئمـه دیـم

گـول الـده، یـار یـانیمـدا، مئییـم پیـالــه مــده

بو ذؤقو اول گولِ خندانه، من اؤزوم دئمـه دیـم

او زولفه چوخدان اسیرم، بو سیرّی ائل ده بیلیر

کی، اولموشام نییه دیوانه، من اؤزوم دئمـه دیـم

دئسم کی، آهیم ایلـه شمـع لـر یـانیـر گئجـه لـر

منـم او شمعـده پـروانـه، مـن اؤزوم دئمـه دیـم

فلک رقیبه ده بیر گون بو دردی چکدیره جـک

اودور سالان منی هیجرانه، من اؤزوم دئمه دیم

نیگـار اولان یئـری خـایـن، رقیبـه بیلـدیـرمــه

او گلمه سین بو گولوستانه، من اؤزوم دئمه دیـم

بیـزیــم محبتــه دیــر اعتقــادیمیــز، واحــد!

اوره ک بو یولدا دؤنر قانه، من اؤزوم دئمه دیـم

علی آقا واحد