بختیار عاشیق اودورکی، اونو جانانـی سئـویـر

بینوا بولبـولـونـو، اؤز گـولِ خنـدانـی سئـویـر

من او زولفون آزی یوز دفعه بلاسین چکدیـم

ده لی کؤنلوم یئنه اول زولفِ پریشـانـی سئـویـر

اعتبـار اولمـاز اؤزون گـؤستـرن عـاشیقلــرده

احسن اول عاشیقه جانـانینـی پنهـانـی سئـویـر

عصرِ حاضرکی، گؤزه لیکلری گؤرمور زاهید

ایندی جهلینی گؤر، روضهٔ رضـوانـی سئـویـر

سئویـرم مـن او نـزا کتلـی گـؤزه ل دلبـری کـی

موسیقی علمینی، رسامی، غزلخوانی سئـویـر

پیـر کـؤنلـوم گلیـر الهـامـه گـؤره رکـن هـردن

بیر نجابتلی گؤزه ل قیز گؤزه ل اوغلانی سئویر

واحدین اووچولوغو اولسادا، انصـافـی دا وار

اؤز کمندینده دوچار ائتدیگی جئیرانی سئویر

علی آقا واحد